Dansk Sprognævn
အေန်သတဳကျုတ် သွက် ဘာသာဒိန် (ဒိန်နေတ်: Dansk Sprognævn) (DSN) ဂှ် ဒှ်အေန်သတဳကျုတ်သုတေသန အလဵုအသဳဍုင် မနွံ သၟဝ် ဌာနဝန်ဇၞော် ကာအခိုက်ကၞာကေုာံယေန်သၞာင်၊ မဒှ်ဂကောံ မဖျေဟ်သ္ဂုတ်သွာတ် ပဒတန် အရေဝ် ကေုာံ လိက် ဗီုပွံင် မအက္ခရ်လိက် ကေုာံ ဗီုပတိတ် ရမ္သာင် မလိက် ဒိန်နေတ်ရ။ နကဵုအေန်သတဳကျုတ်ဏအ် ကၠောန်ပ္တိတ် အဘိဓာန် ပွံက်မအက္ခရ် ဒိန်နေတ် (retskrivningsordbog) ကေုာံ ပရိုင် နူ အေန်သတဳကျုတ် သွက်ဘာသာဒိန် (Nyt fra Sprognævnet) မချူလဝ် ပရူ မဆေင်ကဵု မအရေဝ်ဒိန်နေတ် ကေုာံ ပရေင်ကမၠောန် နူကဵုအေန်သတဳကျုတ်ဂှ်ရ။ ပါဲနူဂှ်တုဲ နကဵု အေန်သတဳကျုတ်ဏအ် ပကောံမအရေဝ် ဒိန်တၟိတၟိ၊ တုဲပၠန် တာလျိုင် သွက်ဂွံဒုင်သၟာန်သှ် ယဝ်ရ ညးမွဲမွဲ သၟာန်ဇာန်နင် စပ်ကဵု လိက်ဒိန်နေတ် ဗီုမဂွံချူ ကေုာံ ဗီုမဂွံသုင်စောဲရ။ အေန်သတဳကျုတ်ဝွံ ဒက်ပ္တန်လဝ် နူကဵုသၞာံ ၁၉၅၅ တေအ်ရ။
ကမၠောန်အဓိက အေန်သတဳကျုတ် သွက် ဘာသာဒိန် နွံ ပိ သာ်:
- မသ္ဒး လ္ၚတ် ဗီုပြင် အရေဝ်ဘာသာ ပြံင်လှာဲ ကေုာံ ဇၞော်မောဝ်တိုန်၊ ဥပမာ မအရေဝ်တၟိမွဲမွဲမ မံက်ကၠုင်မ္ဂး ဒးချူစၟတ်သမ္တီလဝ်။
- မသ္ဒး သှ်ကဵု လတူဂလာန်သမာန် မသၟာန်ကၠုင် စပ်ကဵု ဘာသာဒိန် ကေုာံ ဗီုမစကာ မအရေဝ်တအ်။
- မသ္ဒး ဖျေဟ်သ္ဂုတ်သွာတ် လိက်ဒိန်နေတ်ဂှ် သ္ဒးချူဗီုလဵု၊ သ္ဒးပံင် မအက္ခရ်ဗီုလဵုတုဲ သ္ဒးဒါန်ပလေဝ် ကေုာံ ပတိတ် အဘိဓာန်ဗီုပွံင်မအက္ခရ် လိက်ဒိန်နေတ် အတိုင်သၞောဝ်ဥပဒေ သၞောဝ်ပဒတန် မလိက်ဒိန်နေတ်။
လဒက်ပ္တန်[ပလေဝ်ဒါန် | ပလေဝ်ဒါန် တမ်ကၞက်]
အေန်သတဳကျုတ် သွက် ဘာသာဒိန် ဂှ် ဒက်ပ္တန်လဝ် နကဵု သၞောဝ်ဥပဒေဍုင် အတိုင်ဗွဲသၟဝ်ဝွံရ။
- ဥပဒေ သၞောဝ်ပဒတန် မလိက်ဒိန်နေတ် (retskrivningsloven) (lov nr. 332 af 14.5.1997 om dansk retskrivning)
- ဥပဒေ လဒက်ပတန် အေန်သတဳကျုတ် သွက် ဘာသာဒိန် (sprognævnsloven) (bekendtgørelse nr. 217 af 13.2.2015 af lov om Dansk Sprognævn)
- ပွံက်ဥပဒေ လဒက်ပတန် အေန်သတဳကျုတ် သွက် ဘာသာဒိန် (sprognævnsbekendtgørelsen) (bekendtgørelse nr. 178 af 9.3.2009 om Dansk Sprognævns virksomhed og sammensætning).